ياميش رمضان
بلينا قمر الدين ف ماورد
قطعنا صواني الحلويات
عدينا العد
انا وانتى وأبويا وبس
الطبلية بتوسع خالص
اقرب ليكى
افتح ف التلفزيون أعلى ف صوته
وافضل أتحرك
واعمل زيطة
يمكن
أملى فراغ الموت والبعد
- يعوده علينا بخير يا ولآد
- لا تبعد مننا آيها حد
يجعل يومي قبل أيامكم
يارب يا بنتى ما اشرب ناركوا
ابص عليهم
ألاقى دموعهم تنزل بصعوبة بين تجاعيد الجلد وحزن العمر
أمد اديا أحاول اخبى دموعي عليهم
ياميييييييييش رمضان
كنا ف وقت سحور
كنا كتير نتلم قبل صلاة الفجر بحبه
ننزل نتسحب نتسحب ونصحي عيال الحتة
ونروح نمشى ورا الشيخ بشويش
ونروح حاطين البمبة بسرعة تحت اقدامة ونجرى ينط ويصرخ نضحك نضحك
يدعي لنا ويطلب منا نروح وياه المسجد
ندخل نبتدى الصلا بخشوع لكن لسه بنضحك
فيعلى ف صوته
صوته ينكب ف ودننا نصعد وياه
كان صوته جميل
لما بيدعى كنا نعيط
م الشوق للجنة فاكهتها
والغفرااااااان
الله
أمي تنادى علينا
- خلاص
- بقيتو شيوخ؟
- تعالو الصبح هيطلع
اتسحرو وارجعوا
واحنا مع الشيخ بندووب ف كلامه ندووووب
كنا كتير نتلم وقت سحور
ونهزر
وأبويا يشخط فينا
- احترموا النعمة يا ولآد الكلب
كان بيقولها ويكتم ضحكه
- عايز اتسحر
نعمل ف مقالب ف النايم فينا
نرسم على وشه بصماد ونصحيه يتسحر
ييجى يغسل وشه لجل يفوق يضحك يضحك
نضحك
وأبويا عامل فيها جد
كان هوه كمان بيموت م الضحك
ويرجع صوت الجامع يعلى
(مولاي إني ببابك قد بسطت يدي مالي ألوذ به اللاك يا سندى)
ننزل للشارع جرى
مولااااااااااااااااااااى
تدمع عينا مع التواشيح
الله- - - - -
كنا نردد وياه
زي كورال أطفال متنظم ومدرب
كان صوتنا جميل
واما أدان المغرب ييجى ونسمع صوت مولانا محمد رفعت ف ازاعة الشرق الأوسط
كنا نقول مع أبويا
إن الراجل ده صوته أكيد م الجنه
- جاى م السما ع لطول
نفطر
نطلع جرى على التراويح
وهات يا مقالب ف اخواتى
وأبويا يشخط فينا
كأنه كان يتشائم م الضحك
- خير اللهم ما اجعله خير يا ولآد
كان عارف
عارف إن الأيام الجايه خراب
نفض ايده الزمن الباقي
ماباقى
غير حبه سراب
- يارب يا بنتى ما اشرب ناركم
الدعا يترد
والأحباب
طاروا زي المسك لما يفوح ويطير وبسرعة
كأنه ماكان
ياميش رمضان
رمضان اهوه
جه
انا
وانتى
وبس
و- - - - مافيش رمضان
